Question 1

Ek het 'n vraag oor inskrywing.

Accepted Answer

Vir enige navrae rondom inskrywing, stuur asb. 'n e-pos aan ciska@bastionps.co.za

Question 2

Hoe hou julle ouers ingelig?

Accepted Answer

Ons stuur boodskappe uit op die d6-platform, wat u gratis op u foon of rekenaar kan aflaai.

Vir u Android-foon, kan u d6 Connect vind op die Play Store.  As u 'n Apple-foon het, kry u d6 Connect op die App Store, en vir 'n Huawei-foon, kan u die foon se AppGallery gebruik en dit daar aflaai.

Vir 'n rekenaar, kan u d6 Connect aflaai by https://d6.co.za/downloads/d6-connect-desktop  Kies die toepaslike bedryfstelsel - Windows of Mac - en volg die instruksies.

Question 3

Bastion se verkeer is 'n nagmerrie!  Waar kan ek my kind optel of aflaai?

Accepted Answer

Vir 'n skool met ongeveer 1 900 leerders, sal parkering noodgedwonge uitdagend wees.  Bastion het 'n parkeerarea in ons "drop & go"-area waar ouers kan parkeer as hulle 'n kind kom optel, asook straatparkering in Jakarandastraat en Proteaweg.  U kan ook in Waltersstraat en Tulipstraat parkeer, aangesien draaihekke vir die leerders se gerief daar geplaas is.  Parkering word egter nie soggens in die "drop & go" toegelaat nie.  U laai slegs u kind daar af en u mag nie soggens u motor verlaat nie.  So verseker ons 'n konstante deurvloei van voertuie en verminder die verkeersknoop.

Ons vra u egter om die veiligheid van ons leerders in ag te neem as u iewers stop.  As u op 'n sypaadjie stop, mag dit dalk vir u gerieflik wees, maar u maak dit vir die kinders wat dan in die straat moet loop om verby u voertuig te kom, gevaarlik.  U voertuig wat op 'n ongemagtigde plek staan, versper bestuurders of kinders se sig van die aankomende verkeer of kinders, wat dit vir hulle onveilig maak.

Neem ook asb. die inwoners rondom die skool in ag.  Selfs persele waar besighede bedryf word, is dikwels ook residensiële eiendomme, met mense wat in/uit hul inritte moet kan kom.  U gaan tog nie daarvan hou as iemand voor/op u inrit parkeer nie - veral nie as u iewers heen moet ry nie!

Al beteken bogenoemde dat u of u kind dalk 'n bietjie verder moet stap, is dit tog die moeite werd om die veiligheid van ons leerders, bestuurders en bure te verseker.  Leer asb. ook u kind hoe om 'n pad as voetganger goed te gebruik, en stel 'n goeie voorbeeld.

'n Gesamentlike verklaring deur Laerskool Bastion en PHA, rakende die verkeer met opgedateerde inligting oor aflaai, is einde Februarie 2026 uitgestuur:

Question 4

Mag ek my kind se boek, taak of sportdrag wat vergeet is, vir hom kom afgee?

Accepted Answer

Nee.
Sedert 2017 is die reël in plek dat slegs kospakkies afgelewer mag word.  Ons wil graag vir ons kinders verantwoordelikheid leer, asook vir hulle leer om die gevolge van hul dade te dra.

Question 5

My kind het sy kosblik vergeet.  Mag ek dit by ontvangs kom afgee vir hom?

Accepted Answer

Ja.
Ons wil graag ons leerders aanmoedig om selfstandig te wees en die gevolge van hul dade te dra, en daarom aanvaar ons nie by ontvangs enigiets anders vir ons leerders nie.  Tog besef ons dat ons leerders dikwels eers na hul sportverpligtinge by die huis of nasorg gaan kom, en dit kan onmoontlik vir 'n kind wees om heeldag sonder kos te wees en steeds gefokus en aktief in die klaskamer deel te neem of op die sportveld te wees.  So 'n kind kan ook ander kinders benadeel.  Daarom maak ons die uitsondering om u toe te laat om u kind se kosblik by ontvangs te mag kom afgee.

Question 6

My kind het iets verloor.  Waar kan hy daarvoor gaan soek?

Accepted Answer

Verlore items wat op die skoolterrein (binne of buite die gebou) gevind word, word gewoonlik by die sekretaresses ingehandig.  As die item gemerk is, word die kind geroep om die verlore item te kom afhaal.  Daarom is dit noodsaaklik dat alle items met u kind se volle naam en van gemerk sal word, nie net voorletters nie.  Help ons asb. om die regte eienaar op te spoor deur die items reg te merk.

Items wat nie reg gemerk is nie, of as die eienaar nie opdaag om sy item op te eis nie, word by die "lost & found" buite juf. Attél van Aarde se klas gebêre en kinders kan ook daar na hul verlore items gaan soek.

Question 7

Ek wil tydens skoolure op die skoolterrein kom, maar al die hekke is gesluit.

Accepted Answer

Hekke op die skoolterrein word gesluit om die leerders se veiligheid te verseker.  U kan by sekuriteit (by die personeelhek in Jakarandastraat) inteken en van daar af na ontvangs beweeg (volg asb. bord na "Reception"), of u kan die hek binne die "drop & go"-area gebruik nadat u die klokkie gelui het, en stap tot by ontvangs, waar u gevra sal word om in te teken en 'n besoekersplakker sal ontvang.

Question 8

My kind is vandag afwesig.  Hoe stel ek die skool in kennis?

Accepted Answer

Stuur asb. 'n e-pos aan admin@bastionps.co.za voor 10:00.  Let asb. daarop dat die skool daagliks aanlyn klasregisters aan die WKOD moet stuur.  U moet 'n geldige rede vir u kind se afwesigheid verskaf.  Verwys asb. na Bastion se Leerderbywoningsbeleid vir meer besonderhede. (Sien onder Algemeen - Beleidsdokumente)

Question 9

My kind moet tydens skoolure die skool verlaat.  Hoe maak ek?

Accepted Answer

Stuur asb. 'n e-pos aan admin@bastionps.co.za om die rede te verskaf, asook om reëlings te tref.

Geen leerder mag die skool vroeg verlaat sonder dat 'n ouer of gemagtigde volwassene die leerder by ontvangs kom haal nie.  Geen leerder mag die skool vroeg verlaat sonder 'n geskrewe versoek en 'n geldige rede nie.

Geen kind sal ooit toegelaat word om die skoolterrein tydens skoolure te verlaat sonder dat die kind deur 'n gemagtigde volwassene vergesel word nie.

Question 10

Wat word deur my skoolgeld gedek?

Accepted Answer

Alle skoolskryfboeke en -handboeke word aan u kind verskaf.  U moet egter self u kind se skryfbehoeftes verskaf.

Skoolgelde sluit u kind se skolastiese onderrig, normale sport- of buitemuurse aktiwiteite deur die skool aangebied en didaktiese klasse in.

Skoolgelde sluit NIE skooldrag, sporttoerusting (bv. hokkiestokke, skrum-pette, ens.), sportdrag, toere, uitstappies, musieklesse, BassieBots (robotika), addisionele ondersteuning tydens assesserings of ekstra klasse na skool in nie.

Question 11

Ek kan die skoolgeld nie bekostig nie.  Hoe doen ek aansoek vir kwytskelding?

Accepted Answer

Stuur asb. 'n e-pos aan adeleb@bastionps.co.za .

Question 12

Ek moet my kind baie vroeg in die oggend aflaai.  Is daar 'n veilige plek op die skoolterrein vir hom om te wag?

Accepted Answer

Ons weet dat daar leerders is wat baie vroeg soggens by die skool  afgelaai word.  Alhoewel dit nie ’n ideale situasie is nie, erken ons dat daar sekere ouers is vir wie dit onvermeidelik is.  Indien leerders  tussen 06:00 en 07:00 afgelaai word, word leerders versoek om na die vierkant langs die saal te beweeg, saam met hul skooltasse.  Hierdie  area is goed belig en is 'n veilige area vir leerders om te wag totdat toesig aan diens is. Opvoeders is aan diens vanaf 07:00, wanneer toesig begin.  Leerders mag  dan na hul onderskeie aantree-areas beweeg.  Let asb. daarop dat as dit in die oggend reën, leerders direk na hul klasse beweeg en wag in die  gang.

Question 13

Hoe moet my kind op 'n civvie-dag aantrek?

Accepted Answer

Alhoewel ons leerders met civvie-dae nie skooldrag dra nie, is daar tog reëls van welvoeglikheid en praktiese reëlings vir 'n skoolopset wat gevolg moet word.  Sien asb. die dokument hieronder vir verdere besonderhede oor wat toegelaat word en wat nie.

Question 14

Watter prestasies word op die skool se sosiale media geplaas?

Accepted Answer

Ons plaas die prestasies wat Laerskool Bastion bereik, hetsy in spanverband of van individuele leerders wat aan skoolaktiwiteite deelneem.

Ons is egter 'n baie groot skool, met vele talentvolle leerders wat op 'n wye verskeidenheid terreine presteer.  Om hierdie rede kan ons ongelukkig nie prestasies in buitesport of ander buite-aktiwiteite op sosiale media plaas nie.  Daar is eenvoudig net te veel.  Wees egter verseker dat ons steeds baie trots op hierdie leerders is, en wel in ons saalbyeenkomste aan hulle erkenning gee.

Algemene Vrae (FAQ's)

Ek het 'n vraag oor inskrywing.

Hoe hou julle ouers ingelig?

Bastion se verkeer is 'n nagmerrie! Waar kan ek my kind optel of aflaai?

Mag ek my kind se boek, taak of sportdrag wat vergeet is, vir hom kom afgee?

My kind het sy kosblik vergeet. Mag ek dit by ontvangs kom afgee vir hom?

My kind het iets verloor. Waar kan hy daarvoor gaan soek?

Ek wil tydens skoolure op die skoolterrein kom, maar al die hekke is gesluit.

My kind is vandag afwesig. Hoe stel ek die skool in kennis?

My kind moet tydens skoolure die skool verlaat. Hoe maak ek?

Wat word deur my skoolgeld gedek?

Ek kan die skoolgeld nie bekostig nie. Hoe doen ek aansoek vir kwytskelding?

Ek moet my kind baie vroeg in die oggend aflaai. Is daar 'n veilige plek op die skoolterrein vir hom om te wag?

Hoe moet my kind op 'n civvie-dag aantrek?

Watter prestasies word op die skool se sosiale media geplaas?